Dr.YSR.Polambadi subjects | డాII వై.ఎస్.ఆర్.పొలంబడి పాఠ్యాంశాలు | Polambadi Activities | raithubadi

Polambadi

డా౹౹వై.ఎస్.ఆర్.పొలంబడి పాఠ్యాంశాలు   

పొలంబడి మొదటి సమావేశం ప్రారంభం కాకముందే సదుపాయకర్త పొలంబడి సాధారణ పాఠ్యాంశాల ను వివిధ కార్యకలాపాల జాబితాను సమయానికి అనుగుణంగా తీర్చిదిద్ది, స్థానిక సమస్యల ఆధారంగా పాఠ్యాంశాలను రూపొందించి ఎంపిక చేయబడిన పొలంబడి రైతుల ద్వారా చర్చించవలెను. ఈ పాఠ్యాంశాల్ని రూపొందించేటప్పుడు శిక్షణా ఉద్దేశ్యాలను, నాణ్యతా ప్రమాణాలను పరిగణనలోకి తీసుకోవలెను. పొలంబడి ప్రారంభించే సమయంలో రూపొందించిన పాఠ్యాంశాలు ఇతర పొలంబడుల కార్యకలాపాల నిర్వహణ కు మార్గదర్శకంగా నిలుస్తుంది.

Polambadi Activities (పొలంబడి కార్యకలాపాలు)

పొలంబడి 14 వారాల కాలపు విలక్షణ కార్యక్రమం. మొదటి సమావేశం, మొలక వెదజల్లడం లేదా నాట్లు వేయడం తో మొదలై పంటకోతల వరకు కొనసాగుతుంది. నాట్లతో మొదలైతే సమావేశాలు వారానికి ఒకసారి నడపబడుతాయి, లేదా పరోక్ష విత్తడం చేసే ప్రాంతంలో వారంకంటే ముందే నిర్వహించబడుతాయి. 
ప్రతీ సెషన్( సమావేశము) ఉదయం ప్రారంభమై మధ్యాహ్నభోజనానికి ముందు ముగించబడుతుంది. పొలంబడి యొక్క విలక్షణమైన కార్యక్రమము ఈ క్రింద ఇవ్వబడింది. పొలంబడి లో పాల్గొనే రైతులు ఆయా ప్రాంతాల ప్రత్యేక సమస్య దృష్ట్యా ఈ కార్యక్రమాన్ని మార్చమని కోరవచ్చు.

పొలంబడి కి ముందు నిర్వహించే కార్యకలాపాలు

1. పంట ఎంపిక.
2. గ్రామ సమావేశ నిర్వహణ.
3. ప్రారంభపు కార్యకలాపాలు 1) 9 చుక్కల ఆట 2) లక్షణాలు గుర్తింపు.
4. రైతుల నమోదు.
5. మూల్యంకన పూర్వ పరీక్ష ( బ్యాలెట్ బాక్స్ పద్దతి).
6. ప్రాధమిక సర్వే ( ఆధార రేఖ సర్వేక్షణ) నిర్వహణ.
7. లోపాలను గుర్తించుట మరియు వ్యూహాలను రచించుట.
8. తగిన జోక్యాలను ఎంపిక చేయుట.
9. మట్టినమూనాల సేకరణ.
10. విత్తనాల మొలకెత్తింపు పరీక్ష.
11. నీటి నిల్వ సామర్థ్యం పై సులభ ప్రయోగాలు.

పొలంబడి లో నిర్వహించే కార్యకలాపాలు

1. పొలంబడి క్షేత్రాన్ని మార్పు చేయడం.
2. వ్యవసాయ ఆవరణ వ్యవస్థ విశ్లేషణ.
3. స్వల్ప మరియు దీర్ఘకాల ప్రయోగాలు.
4. ప్రత్యేక పాఠ్యాంశాలు.
5. బృంద విన్యాసాలు.
6. మూల్యాంకనంతర పరీక్ష( బ్యాలెట్ బాక్స్ పద్దతి).
7. ప్రకృతి వ్యవసాయ పద్దతులపై ఒక ప్రదర్శన క్షేత్రం.

పొలంబడి అనంతరం కార్యకలాపాలు

1. క్షేత్ర దినోత్సవం.
2. రైతులకు నైపుణ్యాన్ని పెంపొందించి, రైతును సదుపాయకర్తగా మార్చే శిక్షణా పాఠ్యాంశాలు.

Dr.YSR.Polambadi subjects

1. సమగ్ర పంటల యాజమాన్య పద్దతులు (Integrated Crop Management)
2. పొలం పరిసరాల విశ్లేషణ (Agro-Ecosystem analysis)
3. భాగస్వామ్య సాంకేతిక కార్యాచరణ పరిశోధనలు (Participatory Technology Development)
4. చీడ, పీడలు  (Pests & Diseases)
5. మిత్ర పురుగుల సంరక్షణ (Conservation of Defenders)
6. మొక్కల పెరుగుదల దశలు, ధర్మాలు (Plant Physiology)
7. ఆరోగ్యఅంశాలు (Health Issues)
8. వృక్ష మరియు జీవ సంబంధమైన కీటక నాశీనులు (Botanical Pesticides & Biological Agents)
9. వ్యక్తిత్వ వికాసము (Personality Development)

సమగ్ర పంటల యాజమాన్య పద్దతులు:

అంటే వై.ఎస్.ఆర్.పొలంబడి ద్వారా అన్ని రకాల పంటల పూర్తి సాగు విధానాలను అందులోని మెళుకువలను నేర్పింపబడుతుంది. వరి, వేరుశనగ, చిరుధాన్యాలు, అపరాలు, మొక్కజొన్న, గోధుమ మొదలగు పంటలన్నింటి యొక్క సమగ్ర పోషకాలు, ఎరువులు, కలుపు, నీరు, సస్యరక్షణ మరియు తెగుళ్ళు నివారణ వంటివి ఖరీఫ్ లో ఎలా ఉంటుంది, రబీలో ఎలా ఉంటుందో పూర్తిగా నేర్పింపబడుతుంది.

పొలం పరిసరాల విశ్లేషణ:   వివిధ రకాల పంటలకు అనువైన భూమి, దానికి ఉండే నీటి వనరులు, అందులో ఉండే వివిధ రకాల మిత్ర, శత్రు పురుగులు మరియు ఆ పొలం చుట్టూ ఉన్న వాతావరణం ఇలాంటి అన్ని విశ్లేషించి పొలంబడి ద్వారా వివరించడం జరుగుతుంది.

భాగస్వామ్య సాంకేతిక కార్యాచరణ పరిశోధనలు: 

ఈ విధానం లో వివిధ పంటల సాంకేతిక పద్దతులు, సమస్యాత్మక వ్యవసాయానికి ప్రత్యామ్నాయ మార్గాలను ఏర్పాటు చేయడం, వ్యవసాయానికి సంబంధించి వివిధ పథకాలను ఏ విధంగా వినియోగిచుకోవాలో తెలియచేయడం మరియు రైతుకు , పరిశోధకులకు మధ్య వారధిగా వ్యవహరించడం వంటి విధివిధానాలు పొలంబడి లో భాగంగా ఉంటాయి.

చీడ, పీడలు : దీనిలో భాగంగా క్రిమికీటకాలు, తెగుళ్ళు వాటి నివారణ చర్యలు వంటివి వివరంగా పంటను బట్టి వివరించడం జరుగుతుంది.

మిత్ర పురుగుల సంరక్షణ:  దీనిలో భాగంగా క్రైసోపా(అల్లిక రెక్కల పురుగు), సాలీడులు, కందిరీగలు, ట్రైకోగ్రామ, టిలీనోమాస్ వంటి గుడ్ల పరాన్నజీవులు, కేరాబిడ్ బిల్లపురుగులు, అక్షింతలపురుగులు వంటి మిత్ర పురుగులు వాటి వల్ల కలిగే లాభాలు, వాటి రక్షణ వంటివి నేర్పుతారు.

మొక్కల పెరుగుదల దశలు, ధర్మాలు:   పంటలలో మొక్క మొలకెత్తిన దగ్గరనుండి, అది పెరిగే విధానము , దాని యొక్క లక్షణాలు వంటివి వివరించడం జరుగుతుంది.

ఆరోగ్యఅంశాలు : పంట మొక్కల ఆరోగ్య పరిస్థితులను ఎలా గమనించాలి, మొక్కలో ఏదైనా పోషక లోపాలు ఉన్నాయా, తెగుళ్ళు ఉన్నాయా వంటి తదితర విషయాలు క్షుణ్ణంగా నేర్పడం జరుగుతుంది.

వృక్ష మరియు జీవ సంబంధమైన కీటక నాశీనులు :

దీనిలో భాగంగా ఇప్పుడు వాడుతున్న హానికరమైన రసాయన కీటక నాశీనులు బదులుగా వృక్ష మరియు జీవ సంబంధమైన కీటక నాశీనులు ఎలా వాడాలి, వాటిని ఎలా తయారు చేసుకోవాలి, దానివలన కలిగే లాభాలు ఏమిటి అనే విషయాలను వివరిస్తారు.

వ్యక్తిత్వ వికాసము :  రైతులలో నూతన వ్యవసాయ పద్ధతుల ద్వారా కొత్త కొత్త విజ్ఞానాన్ని అందించి వారిలో ఆత్మవిశ్వాసం నింపి, వారి హక్కుల పట్ల, వారికి ఉండే ప్రభుత్వ వెసులుబాట్లు, సమాజంలో వారికి ఒక గుర్తింపు వంటివి వివరించడం జరుగుతుంది.